Kandidati i Partisë Demokratike të Kosovës për Komunën e Kaçanikut, Sabedin Vishi, ka premtuar ndërtimin e një strehimoreje për qentë endacakë, si pjesë e planit të tij për zgjidhjen e këtij problemi që po shqetëson qytetarët.
Sipas Vishit, çështja e qenve endacakë nuk është vetëm problem i Kaçanikut, por i të gjitha komunave të Kosovës, prandaj kërkon një zgjidhje të qëndrueshme.
“Në programin tonë kemi paraparë ndërtimin e një strehimoreje për qentë endacakë, me qëllim të zvogëlimit të rrezikut për fëmijët dhe të moshuarit”, ka deklaruar Vishi.
Përveç kësaj, Vishi ka theksuar se në programin e tij parashihen edhe projekte të tjera si përfundimi i shkollës “Ali Asllani” në Doganaj, transport falas për nxënësit e shkollave të mesme, rritje të bursave dhe subvencion prej 200 eurosh për çdo të porsalindur.
Sipas Vishit, këto masa janë pjesë e një programi që synon të përmirësojë jetën e qytetarëve të Kaçanikut dhe të sigurojë zhvillim të qëndrueshëm për komunën.
