Albin Kurti nuk arriti të sigurojë 61 vota për formimin e qeverisë, megjithatë Lëvizja Vetëvendosje nuk ka hequr dorë nga përpjekjet për krijimin e institucioneve.
Të martën, Këshilli i Përgjithshëm i VV-së propozoi emrin e Glauk Konjufcës si mandatar për formimin e qeverisë së re.
Kryeministri në detyrë, Albin Kurti, vlerësoi lartë bashkëpartiakun e tij dhe kërkoi nga opozita që ta përkrahë propozimin, në mënyrë që vendi të shmangë zgjedhjet e reja.
“E bëjë këtë propozim jo për të bërë lëshim, sepse rregulli i demokracisë thotë që subjektet vendosin vetë. Për Lëvizjen Vetëvendosje as nuk ka vendosur dhe as nuk do të vendosë ndonjë subjekt tjetër. Megjithatë, pas diskutimeve të gjera në kryesi, unë propozoj që mandatin e dytë për krijimin e qeverisë t’ia japim nënkryetarit, aktivistit dhe mikut tonë të besueshëm, Glauk Konjufca”, ka thënë Kurti.
Pas përfundimit të mbledhjes, Kurti nuk dha deklarata para gazetarëve për vendimin e ri të partisë, ndërsa për propozimin foli vetë mandatari për kryeministër, Glauk Konjufca.
Ish-kryeparlamentari theksoi se prioritet mbetet miratimi i buxhetit të vitit 2026 dhe shmangia e zgjedhjeve të menjëhershme.
Andaj kërkoi bashkëpunim me opozitën, por jo koalicion me ta.
“Ky nuk do të jetë një proces për krijimin e ndonjë koalicioni. Ideja është të formojmë një qeveri të re për të shmangur zgjedhjet dhe për të bashkëpunuar me partitë parlamentare që Kosova ta ketë buxhetin për vitin 2026. Nëse këto nuk bëhen, nuk do të ishte në të mirë të vendit. Për këtë arsye, LVV-ja më propozoi si mandatar dhe unë e pranova. Tani mbetet të shohim veprimin e presidentes së Republikës”është shprehur Konjufca.
Tutje, Konjufca u bëri thirrje deputetëve që të veprojnë me përgjegjësi dhe racionalitet.
“Kemi çështje urgjente përpara. Në planin ndërkombëtar është edhe Plani i Rritjes i Bashkimit Evropian, dhe nëse vonohemi, rrezikojmë të humbim qindra miliona euro që i janë premtuar Kosovës. Prandaj do t’ua kërkoj bashkëpunimin partive opozitare – jo për një qeveri afatgjatë me koalicione, por vetëm për të kaluar këto çështje të domosdoshme. Pastaj le të vendosin vetë si të duan”, ka theksuar Konjufca.
Të menjëhershme, qenë reagimet e opozitës. Partia Demokratike e Kosovës ka theksuar që çdo përpjekje e VV-së është e dështuar duke nënvizuar se zgjedhjet janë zgjidhje. Edhe Lidhja Demokratike e Kosovës, është e të njëjtit mendim. Kreu i kësaj partie, Lumir Abdixhiku ka shkruar që shfaqja teatrale e mandatarëve pa numra, duhet të marrë fund.
Zgjedhje kanë kërkuar edhe në Aleancën për Ardhmërinë e Kosovës, kreu i AAKsë, ka thënë që presidentja Osmani s’ka mandat ta mandatojë askënd për krijimin e qeverisë pa dëshminë se i ka numrat.
Edhe NISMA Socialdemokrate ka vlerësuar se Kuvendi s’ka shumicë dhe zgjidhje mbeten zgjedhjet.
Afati dhjetëditor për mandatimin e një kandidati të ri nga presidentja e vendit, Vjosa Osmani, përfundon më 5 nëntor. Nëse nuk ka marrëveshje, pritet që vendi të shkojë në zgjedhje të parakohshme.
