Po i afrohen ditët e fundit në detyrë.
Izmir Zeqiri, postin e kryetarit të Zubin Potokut e mori në një periudhë të tensionuar, kur serbët po protestonin kundër vendosjes së kryetarëve shqiptarë në komunat veriore.
Me kalimin e kohës situata u qetësua dhe Zeqiri me sukses po e përfundon mandatin e tij në krye të komunës.
Ai tregon se kjo periudhë nuk ka qenë fare e lehtë për të, megjithëse shprehet krenar për të arriturat.
“Ka qenë një fillim i vështirë dhe sfidues për punën time si kryetar. Serbët që banojnë në këto zona nuk e pranuan mirë lajmin për kryetarët shqiptar andaj edhe na kanë kundërshtuar ashpër por me kalimin e kohës situata u normalizua”, thotë Zeqiri për Tëvë1.
Zeqiri thotë se qytetarët serbë kanë qenë nën presion nga grupet kriminale, por pas shpartallimit të tyre, në komunë filloi një bashkëpunim i mirë mes shqiptarëve dhe serbëve.
“Të them të drejtën qytetarët serbë ishin edhe nën presion nga disa grupe kriminale që më vonë u shpartalluan nga Policia e Kosovës. Pas largimit të tyre, filloi një bashkëpunim i mirë me qytetarët serbë për t’i vazhduar punët në komunë”, shprehet ai.
Tutje, Zeqiri thotë se kushdo që do ta udhëheq komunën pas tij, është i obliguar të respektojë ligjet e Republikës së Kosovës.
“Kryetari i ardhshëm e ka për obligim që të funksionojë në bazë të ligjeve të Kosovës ose ndryshe do të përballet me ligjin. Kjo vlen për të gjithë”, thotë Zeqiri.
Kryetarë të komunave veriore u zgjodhën kandidatët e partive shqiptare pasi ata nga partitë serbe bojkotuan zgjedhjet e 23 prillit të vitit 2023.
Ndërkaq kryetari i ardhshëm i komunës së Zubin Potokut do të jetë Milosh Pervoq nga Lista Serbe, i cili doli fitues në zgjedhjet lokale me 2.877 vota.
