Uji i lumit Ibër ka depërtuar mbrëmjen e së premtes në vendpunishten ku po ndërtohet ura e re që lidh veriun dhe jugun e Mitrovicës, duke shkaktuar vështirësi për ekipet e punimeve.
Sipas pamjeve të siguruara nga Tëvë1, pjesa më e madhe e punishtes është përmbytur tërësisht, pasi niveli i ujit është rritur ndjeshëm.
Punimet për urën e re janë pjesë e projektit për ndërtimin e dy urave të reja mbi lumin Ibër, të cilat pritet të lehtësojnë qarkullimin ndërmjet pjesës veriore dhe jugore të qytetit dhe të zvogëlojnë ngarkesën në urën kryesore të Mitrovicës, e cila historikisht ka qenë një pikë ndarjeje mes komuniteteve.
Ura e parë është pothuajse në fazën përfundimtare, ndërsa ura e dytë, në të cilën ka depërtuar uji, ndodhet në procesin e punimeve fillestare.
Për këtë rast, zëvendësdrejtori i Policisë për veriun, Veton Elshani ka deklaruar për Tëvë1 se deri më tani nuk ka elemente për vepër penale.
Kurse, për dëmet që janë shkaktuar tek pajisjet janë në diskutim në mes Ibër-Lepencit dhe kompanis që merret me ndërtimet.
Madje, Elshani ka bërë të ditur se Prokurori do të vendos për hapat e mëtutjeshëm.
“Deri në këtë moment kur ne ju shkruajmë, nuk ka elemente për vepër penale, ndërsa për dëmet që janë shkaktua aty te pajisjet janë për diskutim në mes Ibër- Lepencit dhe kompanisë që i bën ndërtimet. Sidoqoftë, Prokurori është ai i cili vendos për hapat e mëtejmë”, thuhet në përgjigjen e Elshanit./teve1.info/
