Kundër ish-skuadrës me të cilën e fitoi Kupën e Kosovës, Debatik Curri do të përballet të shtunën, por kësaj radhe si kryetrajner i Gjilanit. Curri që u emërua shef i skuadrës gjilanase, kthehet në kryeqytet me synim të këndellet nga humbja e mesjavës dhe t’i prishë planet bardhekaltërve.
Por këtë duhet ta bëjë ndaj lideres së ligës, që në mesjavë u mposht nga Llapi dhe prishi serinë prej gjashtë fitoreve rresht.
Dueli luhet në “Fadil Vokrri” dhe nis nga ora 18:30.
Gjilani vazhdon të jetë në fundin e tabelës me vetëm 11 pikë pas 11 ndeshjeve derisa Prishtina prin me 25 pikë, tri më shumë se Ballkani.
Skuadra nga Suhareka luan poashtu të shtunën dhe përballë do të ketë Ferizajn. Ish-kampioni i Kosovës vjen nga fitorja e thellë me Malishevën, derisa është në seri prej tri ndeshjeve pa humbje, për dallim nga “ujqit” që janë në vendin e tetë me 13 pikë.
Të dielën zhvillohen tri ndeshje të tjera.
Nga ora 13:00 zhvillohet kryendeshja Drita – Llapi në Gjilan. Në Lipjan, Prishtina e Re është nikoqire e Drenicës dhe në Klinë, Dukagjini e pret Malishevën.
