Qeveria në detyrë e Republikës së Kosovës ka miratuar sot rritjen e pensioneve dhe shtesave për fëmijë, vendim që do të hyjë në fuqi duke filluar nga muaji nëntor.
Ministri në detyrë i Financave, Punës dhe Transfereve, Hekuran Murati, bëri të ditur se vlera e përgjithshme për mbulimin e rritjes së pensioneve do të jetë mbi 11 milionë euro.
“Kjo parasheh rritjen e pensioneve nga 120 në 150 euro, si dhe përfshin skemat e fëmijëve me aftësi të kufizuara 1–18 vjeç, pensionin familjar dhe pensionin invalidor të punës. Kostoja e përgjithshme është 11.47 milionë euro,” tha Murati.
Sa i përket shtesave për fëmijë, ministri njoftoi se ato do të rriten për 50 për qind.
“Shtesa që ishte 20 euro bëhet 30 euro, ndërsa shtesa që ishte 30 euro bëhet 45 euro,” sqaroi Murati.
Vendimi i Qeverisë synon të përmirësojë mirëqenien e qytetarëve, veçanërisht të kategorive të ndjeshme si pensionistët, fëmijët dhe personat me aftësi të kufizuara.
