Është një nga sasitë e mëdha të substancave narkotike që është konfiskuar nga Policia e Kosovës.
Në këtë aksion që u zhvillua të martën, Drejtoria për Hetimin e Narkotikëve arrestoi një person si vazhdimësi e hetimeve në qytetin e Ferizajt.
Arrestimi i kishte paraprirë edhe kapja e një sasie drogë më herët të po të njëjtit grup që operonte në këtë qytet.
Drejtori i Anti-Drogës në Policinë e Kosovës, Reshat Murseli për tëvë1 dha detaje nga aksioni i kësaj njësie.
“Në zgjerim të hetimit kemi arritë që dje me kapë edhe një sasi diku 725 gramë të llojit kokainë, është arrestuar një person. Në vazhdimësi të këtij operacioni policor përsëri njësia është angazhuar në kapjen e një personi tjetër të involvuar në këtë rast dhe sot ka arritë me arrestu përsëri një person tjetër që në këtë rast. Dmth kemi të bëjmë me një grup i cili ka vepruar si një grup kriminal në rajon të Ferizajt kryesisht ka pasur qëllim shpërndarjen e kokainës në nivel lokal”, ka thënë ai për Tëvë1.
Hetuesit e anti-drogës patën punë edhe në qytetin e Fushë Kosovës ku për një kohë hetonin një grup me shtetësi turke që vepronin në Kosovë për qëllime kinse biznesore.
“Kemi marrë veprime në teren dhe në kontroll e sipër në dy lokacione kemi gjetur një sasi të vogël të substancave narkotike diku një kilogramë e gjysëm të llojit marihuanë por kemi gjetur prova materiale të cilat lidhen edhe me rastet e kaluara ku grupi kriminal ka vepruar si i organizuar dhe ka vepruar si i organizuar dhe ka kryer transportim të substancave narkotike së paku në këtë fazë dyshohet duke përdorur Kosovën si territor drejt vendeve tjera gjegjësisht Turqisë”, tregon Murseli.
Ai tregon edhe për hapat që priten të merren ndaj tyre ditëve në vazhdim në bashkëpunim me autoritetet turke.
“Kemi dyshime të bazuara se ata kanë qenë të involvuar në trafikimin e narkotikëve. Natyrisht se tani do të bashkëpunojmë përmes Zyrës për bashkëpunim ndërkombëtar, do t’i shpërndajmë informacionet me autoritetet turke ku kemi një bashkëpunim me këto autoritete dhe do të shohim pastaj se çfarë në të ardhmen pritet të sjellin hetimet për këta persona, natyrisht se ne do të bëjmë një hetim për të kaluarën e tyre kriminale pastaj do të mbledhen të gjitha provat dhe faktet që i kemi këtu dhe natyrisht përfundimi besoj që do të jetë në favorin tonë”, shprehet drejtori i anti-drogës
Kjo Drejtori gjatë javës së kaluar ka arritur të identifikojë dy të dyshuar, ku një shtetas malazez është arrestuar pasi që te i njëjti është gjetur një sasi 2 kilogramë kokainë.
