Qatip Osmani nuk është më trajner i skuadrës së Malishevës.
Ekipi nga Superliga ka njoftuar të premten se Osmani është larguar, pasi kryesia e klubit ka aprovuar dorëheqjen e tij.
“FC Malisheva njofton se pas ndeshjes së fundit kundër FC Ballkani, Kryetrajneri Qatip Osmani ka ofruar dorëheqjen para kryesisë së klubit. Pas analizimit me kujdes të ecurisë së deritanishme dhe rezultateve, klubi e ka mirëkuptuar dhe aprovuar dorëheqjen e Kryetrajnerit Qatip Osmani”, thuhet në njoftim.
Së bashku me Osmanin janë larguar edhe ndihmësit Bashkim dhe Liridon Kukaj.
“FC Malisheva do t’i mbajë dyert e hapura për bashkëpunim edhe në të ardhmen me secilin prej jush. Deri atëherë, ju urojmë shëndet dhe shumë suksese në rrugëtimin tuaj profesional”, ka shkruar Malisheva.
Klubi ka bërë të ditur se po punon për të emëruar sa më shpejt Kryetrajnerin e ri dhe për kompletimin e shtabit teknik.
Osmani pati marrë drejtimin e Malishevës pas largimit të Bekim Isufit, ndërsa opsion për të marrë pozitën e trajnerit po flitet të jetë Elon Berisha.
Berisha, javë më parë u largua nga Prishtina e Re, ekip që këtë sezon e promovoi në Superligë.
