Policia e Kosovës ka njoftuar se në qarkullim po shpërndahen e-mail-e të rreme, të cilat paraqiten kinse si komunikime zyrtare të saj dhe institucioneve të tjera ndërkombëtare të sigurisë, përfshirë FBI-në, INTERPOL-in dhe Agjencinë e Sigurisë Kibernetike.
Sipas Policisë, këto e-mail-e mbajnë titullin “FTESË/ARRESTIM I MENJËHERSHËM” dhe pretendojnë se janë dërguar nga zyrtarë të lartë të policisë, duke kërkuar nga marrësit që të paraqiten brenda 24 orësh në Departamentin e Krimit Kibernetik.
Policia sqaron se këto dokumente janë të falsifikuara dhe nuk kanë asnjë lidhje me Policinë e Kosovës apo ndonjë institucion tjetër zyrtar.
“Këto informacione të dërguara nga kinse zyrtarë të lartë të PK-së, të emërtuara “FTESË/ARRESTIM I MENJËHERSHËM”, të lëshuara siç potencohen në e-mail nga stafi i lartë menaxhues i PK-së, Agjencia e Sigurisë Kibernetike në Kosovës, Byroja Federale e Hetimeve (FBI), Policia Kombëtare e Krimit Kibernetik dhe Organizatën Ndërkombëtare të Policisë Kriminale (INTERPOL) etj., e që kinse janë lëshuar me qëllim të njoftimit të palës së caktuar për siç ceket “Keni 24 orë kohë për t’u paraqitur në selinë e policisë, departamenti i krimit kibernetik”, NUK janë dokumente zyrtare të Policisë së Kosovës, e aq më pak të lëshuara nga zyrtarë të lartë brenda PK-së, por janë e-mail-e/dokumente të falsifikuara për përdorim me qëllime të caktuara”, thuhet në njoftim.
Tutje bëhet e ditur se Policia ka nisur hetime intensive për identifikimin e personave përgjegjës, në bashkëpunim me organet e drejtësisë dhe njësitet kompetente policore.
“Policia e Kosovës si institucion i zbatimit të ligjit, në bashkëpunim dhe koordinim me organet e drejtësisë, pas sigurimit të informacioneve rreth qarkullimit të e-mail-eve/informacioneve të tilla, ka filluar hetimet intensive, duke angazhuar njësitet kompetente policore, me qëllim të hetimit, verifikimit dhe zbulimit të kryerësve të kësaj vepre penale”, theksohet në njoftim.
Ndërkohë, Policia e Kosovës u ka bërë thirrje qytetarëve që të mos bien pre e mashtrimeve të tilla dhe që çdo e-mail të dyshimtë ta raportojnë në adresën zyrtare të saj.
“Policia e Kosovës njofton dhe njëherit fton qytetarët që të mos bien pre e dezinformatave/mashtrimeve të tilla dhe kushdo që mund të pranojë ndonjë e-mail/dokument të tillë, ta adresojë në adresën zyrtare të PK-së [email protected] për trajtim dhe kompetencë të mëtejme”, thuhet në fund të njoftimit./teve1.info.
