Veliu ka thënë se është dashur të kaloj një vit që Abdixhiku ta kuptoj këtë, përcjell teve1.info
Sipas tij, Abdixhiku kishte komunikim të përditshëm me Osmanin, derisa ai e “bëri atë presidente”.
“Është dashur të kaloj një vit që Lumiri ta pranoj se Vjosa Osmani nuk është presidente e të gjithëve. E tha se me presidenten ka vetëm një komunikim institucional. Shumë normale kjo. Derisa e bëri presidente kishte komunikime të përditshme. Një presidente që ka ardhur në pushtet nën petkun e VV-së dhe e përkrahur nga disa deputetë të LDK-së të ndikuar nga Lumiri, pra pa konsensus të gjerë, nuk mund të jetë e të gjithëve! E VV-së po, pa dyshim, por pse jo e Lumirit dhe e kompanisë së tij, kjo është pak e çuditshme!”, ka shkruar ai.
Ish-nënkryetari i LDK-së potencoi se Osmani sillet ndaj Abdixhikut sipas një thënie të vjetër “E kapërceva lumin…”.
“Nuk është për t’u habitur pse Vjosa sillet ndaj Lumirit sipas asaj thënies “E kapërceva lumin…”. Fundja, askush nuk ka pritur se do të ndryshojë Vjosa, që ka shkëlqyer si politikane përçarëse dhe konfliktuoze, deri në përpjekjen për shkatërrimin e partisë që e rriti”, ka shtuar Veliu.
Kryetari i LDK-së Lumir Abdixhiku, dje në një emision në mediat vendore ka thënë se me presidenten Osmani ka vetëm komunikim institucional. Ai ka theksuar se presidentja nuk është e të gjithëve, siç do të duhej të ishte. /Teve1.info/
