Dy ditë para mbajtjes së seancës për formimin e qeverisë, ishte planifikuar të mbahej një takim mes dy partive opozitare, NISMA dhe LDK.
Burime të Tëvë1 brenda Nismës kanë bërë të ditur se takimi ishte planifikuar të mbahej të premten, por pa dhënë shumë detaje.
Për këtë takim, detaje nuk ka dhënë as nënkryetari i Lidhjes Demokratike të Kosovës, Lutfi Haziri, por as nga NISMA, ndonëse Tëvë1 merr vesh se takimi është anuluar.
Në anën tjetër, i pyetur nëse ka ndonjë marrëveshje për ta votuar mandatarin për kryeministër, Albin Kurti, Haziri mohoi një gjë të tillë.
“Nuk e di që ka takime të veçanta, përveç që ka komunikime presim që vazhdimisht Kurti dhe eksponentë të Vetëvendosjes e kanë thënë që ka qeveri por nuk ka Kuvend. Tani kur kemi Kuvend të shohim a ka qeveri. Nuk ka marrëveshje dhe kjo të bënë me besua se do të jetë e vështirë rezultati i të dielës, për seancën ku pritet me dalë mandatari me ekspoze dhe kabinet qeveritar përderisa nuk ka marrëveshje, nuk pritet të zbardhët asgjë të dielën”, tha Haziri.
E analistja, Arta Tahiri- Beqa thotë se duke parë situatën aktuale, zgjedhjet janë e vetmja zgjidhje.
“Ajo çfarë unë po e shoh të dielën partitë tjera opozitare dy ditë e fundit janë deklaruar që nuk duan ta marrin të drejtën e mandatarit dhe pritet që të shkohet në zgjedhje shumë më shpejt në qoftë se nuk formohet të dielën qeveria, të shkohet në zgjedhje të jashtëzakonshme më shpejt. Çuditërisht po koicidon edhe me balotazhin edhe sikur të gjitha subjektet politike, po dëshirojnë të shkojmë sa më afër zgjedhjeve nacionale edhe atyre lokale”, tha analistja politike.
Sidoqoftë, Tahiri theksoi se edhe nëse do të ketë qeveri, ajo mund të ketë jetëgjatësi deri në mars të vitit 2026, meqë janë zgjedhjet për president të vendit.
“Në qoftë se mund të shtyhet në fakt, më së shumti i konvenon të shtyhet deri në mars kur duhet të bëhet mandatari i presidentit apo presidente. Unë mendoj se është një matematikë e prapët e të parit të vendit siç ka ndodhur më 2021-en, në qoftë se Vjosa Osmani siç e ka shprehur dëshirë me të drejtë që të vazhdojë një mandat të dytë si presidente e vendit, në qoftë se nuk i merr gjasat janë ajo të kthehet prapë në politikë dhe të jetë një koalicion i 2021-es dhe të garojnë së bashku”.
Seanca për formimin e Qeverisë do të mbahet të dielën e 26 tetorit nga ora 10:00.
