Në emisionin “Info Nata” në Tëvë1, analisti politik, Blerim Canaj, ka komentuar koalicionet lokale dhe qëndrimet e partive ndaj kryeministrit në detyrë, Albin Kurti.
Canaj tha se në politikë duhet të ekzistojë gatishmëria për kompromis dhe kush nuk është i gatshëm të bëjë kompromis, nuk ka vend në politikë.
Megjithatë, sipas tij, partitë që e quajnë Kurtin “tradhtar” e “të dëmshëm për vendin”, por pranojnë të bashkëpunojnë me të, po tregojnë mungesë koherence
“Dikush që nuk është i gatshëm të bëjë kompromis në politikë, nuk ka çka kërkon në politikë, sepse politika është kompromis. Unë nuk kam asgjë kundër që partitë të flasin mes vete, por nëse e quajnë Kurtin tradhtar dhe të dëmshëm për vendin, pse pastaj duan të bashkëpunojnë me të?”, tha Canaj.
Ai shtoi se kur partitë nuk arrijnë ta largojnë Kurtin nga skena politike përmes bindjes së qytetarëve, atëherë i kthehen marrëveshjeve politike.
“Gjermanët kanë një fjalë të urtë: çka nuk mund ta ndalësh – shtyje. Kjo po ndodh tani. Nuk po munden ta ndalin dhe po e shtyjnë,” përfundoi ai.
