Policia në Preshevë dhe Vranjë po heton një rast të rëndë të shantazhit dhe abuzimit seksual me të mitura, që dyshohet të jetë kryer nga një grup të miturish. Sipas njoftimeve zyrtare, dy vajza të mitura kanë dhënë deklarata dhe janë nën mbrojtjen e institucioneve, ndërsa për hetimin janë angazhuar autoritetet relevante në rajon, raporton novosti.rs, transmeton Tëvë1.
Zëdhënësi i Policisë së Vranjës, në një komunikatë për media, deklaroi:
“Policia ka pranuar denoncimin për këtë rast dhe po zhvillon hetime intensive. Dy të miturat kanë dhënë dëshmi dhe po mbrohen sipas standardeve ligjore. Janë marrë të gjitha masat për të mbrojtur sigurinë e viktimave dhe për të identifikuar përgjegjësit.”
Ai theksoi se po punohet në bashkëpunim me Administratën e Shkollës dhe Qendrën për Punë Sociale në Preshevë, për mbështetjen dhe mbrojtjen e vajzave të përfshira.
Gjykata e Lartë në Vranjë njoftoi se në procedurë janë disa të mitur të dyshuar për shpërndarje të materialeve intime dhe abuzim ndaj shokëve të tyre, ndërsa rasti ndodhet nën hetim të thelluar. Një përfaqësues i gjykatës tha:
“Rasti është duke u trajtuar me seriozitet maksimal. Janë marrë masa për mbrojtjen e viktimave dhe janë angazhuar të gjitha autoritetet për zbardhjen e plotë të ngjarjes dhe ndëshkimin e përgjegjësve, në përputhje me ligjin.”
Në një zhvillim tjetër, policia konfiskoi armët që i përkisnin babait të njërës nga vajzat e përfshira, për shkak të rrethanave të krijuara dhe tensioneve të mundshme midis familjeve në komunitet.
