Komisioni Qendror i Zgjedhjeve ka vendosur sot që të bëjë rinumërimin e 16 kutive të votimit që i përkasin komunave të ndryshme të Kosovës.
Sipas vendimit të marrë në mbledhjen e rregullt, 5 nga këto kuti i takojnë zgjedhjeve për Kryetarë të Komunave, ndërsa 11 të tjera për Kuvende Komunale. Komunat ku do të bëhet rinumërimi janë: Deçan, Drenas, Gjilan, Prishtinë, Prizren, Shtime dhe Suharekë.
Vendimi është marrë bazuar në Rregulloren Zgjedhore për Qendrën e Numërimit dhe Rezultateve, sipas së cilës kutitë e votimit rekomandohen për rinumërim në rast të mospërputhjeve të të dhënave, konkretisht kur:
- Numri i nënshkrimeve në Listën e Votuesve është më i madh se numri i fletëvotimeve në kuti, ose
- Numri i nënshkrimeve është më i vogël se numri i fletëvotimeve në kuti.
Gjatë mbledhjes, anëtari i KQZ-së, Sami Kurteshi, ngriti shqetësime serioze në lidhje me votimin me asistencë, veçanërisht në Han të Elezit, ku, sipas tij, janë shënuar parregullsi të theksuara.
“Mbi 500 persona në Han të Elezit kanë votuar me ndihmën e një personi tjetër. Kjo përbën rreth 10% të numrit të përgjithshëm të votuesve në këtë komunë,” tha Kurteshi.
Ai shtoi se gjysma e këtyre personave janë deklaruar se kanë probleme me shikim, por sipas tij, besueshmëria e këtyre të dhënave është e diskutueshme.
“Propozoj ndalimin e votimit me asistencë në rastet kur kjo dukuri shfaqet në përmasa të mëdha dhe të dyshimta. Të gjitha vendvotimet me numër të lartë të votimeve me asistencë duhet të shkojnë në rivotim,” theksoi ai.
KQZ nuk ka marrë ende një vendim lidhur me këtë propozim, por diskutimet pritet të vazhdojnë në mbledhjet e ardhshme.
