Në Qendrën e Numërimit të Rezultateve ka përfunduar numërimi i votave me postë për kandidatët për kryetar të Dragashit.
Më së shumti vota mori Bexhet Xheladini LDK 55.92 për qind ose 1.181, pasuar nga Shaban Shabani PDK 25.43 për qind ose 537 vota, Filiz Mustafa Vetëvendosje 16.57 për qind ose 350 vota, Usmen Baldzhi Koalicioni VAKAT 1.23 për qind ose 26 vota dhe Nexhmidin Sejdilar0.85 për qin ose 18 vota.
Rezultatet preliminare të KQZ-së tregojnë se Dragashi do të shkojë në balotazh më 9 nëntor. Sipas këtyre rezultateve, kandidati i LDK-së prin me 43.98 për qind ose 5.435 vota, ndërsa kandidati i PDK-së ka 28.38 për qind ose 3.507 vota.
Kujtojmë, në Qendrën e Numërimit dhe Rezultateve ka filluar procesi i numërimit të votave që i takojnë votimit jashtë Kosovës, i realizuar përmes postës nga 17 shtatori deri më 11 tetor 2025.
Tërheqja e pakove me fletëvotime është bërë nga kutitë postare të KQZ-së në 22 shtete të ndryshme si dhe nga kutia postare e KQZ-së në Kosovë.
Nga këto 23 kuti postare, janë tërhequr 33.841 pako të supozuara me fletëvotime, të cilat i janë nënshtruar procesit të vlerësimit. Vlerësimi ka për qëllim të vërtetojë se pako është dërguar nga votuesi i regjistruar për të votuar nga jashtë Kosovës.
Nga të dhënat që kemi nga shërbimi votues, numri i pakove të supozuara me fletëvotime që janë aprovuar është 29.636, ndërkaq janë refuzuar 3.977. Arsyeja më e shprehur se përse janë refuzuar këto pako, në 3.660 raste mungon dëftesa e regjistrimit, një dokument, me të dhëna unike, që votuesi i regjistruar e pranon nga KQZ-ja.
Një votues ka pasur të drejtë të dërgojë nga një fletëvotim për secilin lloj të zgjedhjeve.
KQZ sqaron se hapja e këtyre pakove/zarfeve do të bëhet nga ekipet e numërimit dhe në fund do të dalin me statistika për çdo komunë.
