Procesi i numërimit të votave të ardhura me postë për komunën e Mitrovicës është drejt fundit, pasi tashmë janë përpunuar rreth 75 për qind e tyre.
Sipas të dhënave të fundit nga Komisioni Qendror i Zgjedhjeve, pas hapjes së tri prej katër kutive, në epërsi është kandidati i Lëvizjes Vetëvendosje, Faton Peci, i cili ka siguruar 302 vota, që përfaqësojnë 56.03 për qind të totalit të deritanishëm.
Pas tij renditet kandidati i Partisë Demokratike të Kosovës, Arian Tahiri, me 175 vota ose 32.47 për qind.
Në pozitën e tretë ndodhet përfaqësuesi i Lidhjes Demokratike të Kosovës, Gëzim Plakolli, me 61 vota të ardhura nga diaspora.
Ndërkohë, sipas rezultateve preliminare nga votimi brenda Kosovës, situata është dukshëm më e ngushtë: Arian Tahiri prin me 47.91 për qind të votave, ndërsa Faton Peci ndjek menjëherë pas tij me 47.78 për qind.
Rezultatet përfundimtare pritet të konfirmohen pas përfundimit të numërimit të të gjitha votave me postë.
