Organizata e Veteranëve të Luftës së Ushtrisë Çlirimtare të Kosovës (OVL-UÇK) ka shprehur mirënjohje për të gjithë pjesëmarrësit në protestën e mbajtur sot në Tiranë.
Në një komunikatë për media, OVL-UÇK ka falënderuar qytetarët nga të gjitha trojet shqiptare që iu bashkuan thirrjes për të kërkuar drejtësi për ish-luftëtarët e UÇK-së.
“Falënderim nga zemra për të gjithë pjesëmarrësit në protestën tonë, nga Shqipëria, Kosova, Maqedonia e Veriut, Lugina e Preshevës, Mali i Zi e deri te mërgata shqiptare anembanë botës. Zëri juaj i bashkuar e bëri këtë protestë madhështore dhe të paharrueshme”, thuhet në reagimin e organizatës.
Veteranët kanë shprehur gjithashtu mirënjohje për institucionet shqiptare, qendrore e lokale, për mbështetjen dhe përkushtimin në lehtësimin e organizimit të protestës.
“Respekt e mirënjohje për Policinë e Shtetit për kujdesin dhe mbarëvajtjen shembullore gjatë gjithë protestës”, vijon njoftimi.
Në fund, OVL UÇK ka falënderuar edhe mediat, për rolin e tyre në pasqyrimin e protestës dhe shpërndarjen e mesazhit të saj.
“Pa mediat, zëri ynë nuk do të kishte jehonën dhe madhështinë që meriton. Faleminderit të gjithëve! Bashkë për drejtësi, bashkë për të vërtetën”, përfundon komunikata.
