Prokuroria Themelore në Ferizaj ka ngritur aktakuzë me kërkesë për caktimin e masës së paraburgimit ndaj të pandehurit R.F., nga komuna e Shtërpcës, për veprën penale “Kanosja”, sipas nenit 181 paragrafi 2 të Kodit Penal të Republikës së Kosovës (KPRK).
Sipas njoftimit të Prokurorisë, ekziston dyshimi i bazuar se më 15 tetor 2025, rreth orës 17:20, në fshatin Biti e Epërme të komunës së Shtërpcës, i pandehuri ka kanosur seriozisht një person, pas një mosmarrëveshjeje rreth një rruge afër shtëpisë së të dëmtuarit.
“I pandehuri me dashje, me qëllim të frikësimit dhe shkaktimit të ankthit, ka kanosur seriozisht me fjalë se do ta privojë nga jeta të dëmtuarin I.S.,” thuhet në njoftimin zyrtar të Prokurorisë.
Në aktakuzë thuhet se i pandehuri, derisa ishte duke lëvizur me automjetin e tij, ka hyrë në pronën e të dëmtuarit dhe e ka kanosur verbalisht me fjalët:
“Ti po lypshe me të myt, o të mys apo don me dit.”
Këto veprime, sipas Prokurorisë, kanë shkaktuar ndjenjë frike dhe pasigurie tek i dëmtuari, duke përmbushur kështu elementet e veprës penale të kanosjes.
“Si pasojë e këtyre fjalëve dhe veprimeve, tek i dëmtuari është shkaktuar frikë dhe pasiguri, me ç’rast i pandehuri ka kryer veprën penale ‘Kanosja’, nga neni 181 paragrafi 2 i KPRK-së,” thuhet më tej në njoftim.
Prokurori i çështjes i ka propozuar Gjykatës që, pas mbajtjes së shqyrtimit gjyqësor dhe administrimit të provave, i pandehuri të shpallet fajtor dhe të dënohet në përputhje me ligjin.
