Kandidati për kryetar të Komunës së Fushë Kosovës nga Lëvizja Vetëvendosje, Valon Prebreza, ka deklaruar se rezultati i balotazhit tregon se qytetarët kanë votuar për ndryshim. Ai tashmë do të garojë në balotazh kundër Besnik Osmanit nga Lidhja Demokratike e Kosovës.
Në emisionin “Mesditë” në Tëvë1, Prebreza tha se shumica e qytetarëve të Fushë Kosovës kanë shprehur vullnetin e tyre për ndërrim të qeverisjes lokale.
“Vota e qytetarëve është për ndryshim, pasi që 60 përqind e tyre kanë vendosur për një ndryshim në Fushë Kosovë,” ka deklaruar Prebreza.
Ai ka kritikuar pushtetin aktual komunal, duke thënë se qasja e mbyllur ndaj qytetarëve dhe keqmenaxhimi kanë sjellë një situatë të vështirë në komunë.
“Largimi i pushtetit aktual ndër vite vjen nga hallet dhe telashet që i kanë qytetarët e Fushë Kosovës. Udhëheqja vetëm nga zyrat dhe mungesa e kontaktit me qytetarët kanë krijuar një situatë kaotike në komunë,” ka theksuar ai.
Prebreza shprehu besimin se Vetëvendosja do të dalë fituese në raundin e dytë të zgjedhjeve.
“Vota qytetare është për një ndryshim dhe unë e di bindshëm që do të fitojmë në zgjedhjet e 9 nëntorit, sepse kemi një diferencë të vogël në përqindje,” ka shtuar kandidati i VV-së.
Balotazhi për Komunën e Fushë Kosovës pritet të zhvillohet më 9 nëntor 2025, ku gara pritet të jetë e ngushtë mes dy kandidatëve, Valon Prebreza (VV) dhe Besnik Osmani (LDK).
