Kryeziu këtë reagim e ka bërë pasi që gjatë ditës së djeshme në media është raportuar se kryeministri Albin Kurti paguan qira prej 250 euro në shtëpinë në lagjen Taslixhe, ndërsa me pronarët e shtëpisë është takuar gjatë udhëtimit të tij të fundit jashtë vendit.
Prandaj përmes një postimi në Facebook, Kryezi ka deklaruar se Kurti banon në shtëpinë e disa bashkatdhetarëve që jetojnë në Norvegji të cilët sipas tij kryeministri i njeh prej kohësh, shkruan teve1.info.
“Kryeministri Kurti paguan qira mujore prej 250 euro. Ai banon në shtëpinë e bashkatdhetarëve Blerim dhe Shega Zagragja që jetojnë në Drammen të Norvegjisë. Kryeministri i njeh ata që prej disa vitesh. Anëtarët e tjerë të familjes Zagragja i ka njoftuar më vonë, pasi që është bërë banor në Taslixhe. Blerim dhe Shega Zagragja kanë dashur që Kryeministrit Kurti t’ia mundësojnë të banojë falas në shtëpinë e tyre, mirëpo Kurti nuk ka pranuar. Janë marrë vesh që ai ta paguajë qeranë aq sa ka qenë duke e paguar më herët te banesa afër parkut të qytetit”, ka shkruar ai.
Tutje Kryeziu ka thënë se shtëpia ku banon Kurti në Taslixhe është e vjetër dhe ka 230 metra katrorë mirëpo sipas tij nuk është e gjitha e shfrytëzueshme.
“Shtëpia në Taslixhe ku banon kryeministri nuk i ka 500 por 230 metra katrorë. Dhe kjo hapsirë nuk është plotësisht e shfrytëzueshme. Dy dhoma janë të papërdorshme, njëra është e bllokuar me gjësendet e pronarit e tjetra është dhomë e sigurisë. Shtëpia është e vjetër rreth 50 vjeç.”, ka thënë ai.
Sipas Kryeziu, Kryeministri Kurti e ka ndërruar vendbanimin pas udhëzimeve të këshilltarëve të sigurisë për të cilët thotë se kanë vlerësuar se organizimi i sigurisë në banesën ku jetonte ai ishte shumë i vështirë.
“Kryeministri pat vendosur që të ndërrojë vendbanim pas udhëzimeve të këshilltarëve të sigurisë të cilët kanë vlerësuar që mbrojtja e afërt dhe policia e Kosovës kanë shumë vështirësi për përgatitjet dhe organizimin e sigurisë aty ku banonte Kryeministri te parku i qytetit”, ka shkruar ai ne fund.
