Presidentja e Komisionit Evropian, Ursula von der Leyen, ka përfunduar qëndrimin e shkurtër në Kosovë.
Pas takimit me kryeministrin në detyrë, Albin Kurti, shefja e Komisionit Evropian nuk u përgjigj në pyetjet e gazetarëve.
Gjatë qëndrimit në Kosovë, Von der Leyen u takua edhe me presidenten, Vjosa Osmani.
Ajo gjatë turneut të saj ka vizituar Shqipërinë, Malin e Zi, Bosnjë e Hercegovinën dhe Serbinë. Pas Kosovës ajo do të qëndrojë për vizitë në Maqedonia e Veriut.
Vizita e saj në vendet e Ballkanit Perëndimor shihet si një rast për të përsëritur mbështetjen e BE-së për rrugën e pranimit të rajonit në BE dhe qasjen graduale në Tregun e Përbashkët, si dhe për të diskutuar Planin e Rritjes prej 6 miliardë eurosh të BE-së për Ballkanin Perëndimor për periudhën 2024-2027.
Ndryshe, herën e fundit që von der Leyen kishte qëndruar në Kosovë ishte në tetor 2024, kur kishte folur për masat ndëshkuese që BE i ka vendosur ndaj Kosovës. Që atëherë, blloku ka njoftuar se ka nisur heqjen e disa masave, që u vendosën më 2023 për shkak të rritjes së tensioneve në veri.
Gjatë asaj vizite, shefja e KE-së kishte lavdëruar Kosovën për punën që kishte bërë në agjendën e reformave për Planin e Rritjes të BE-së. Kosova nuk ka përfituar nga ky Plan, pasi për shkak të mungesës së krijimit të institucioneve deri më tani nuk janë miratuar marrëveshje të rëndësishme ndërkombëtare.
Plani i Rritjes prej 6 miliardë eurosh përfshin investime dhe reforma si pjesë e agjendës reformuese për periudhën 2024-2027, prej tyre dy miliardë janë në formë granti, ndërsa katër miliardë janë në formë kredie me këste të favorshme.
