Presidentja e Republikës së Kosovës, Vjosa Osmani, ka dalë në mbështetje të protestës gjithëkombëtare që do të mbahet më 17 tetor në Tiranë, për të përkrahur ish-krerët e Ushtrisë Çlirimtare të Kosovës (UÇK) që po gjykohen në Hagë.
Në një deklaratë pas vizitës së saj në Klinikën e Onkologjisë në Qendrën Klinike Universitare të Kosovës, së bashku me drejtoreshën e organizatës “Jeta Vita”, Nafije Latifi, Osmani theksoi rëndësinë e drejtësisë dhe mbështetjen e protestave për këtë çështje.
“E mbështes këtë protestë dhe kam mbështetur secilën protestë që thërret për drejtësi. Qytetarët dhe shqiptarët nuk kanë kërkuar asgjë tjetër përveç drejtësisë. Drejtësi e cila respekton parimet më të larta të mbrojtjes së drejtës së njeriut,” tha Presidentja Osmani.
Ajo theksoi se Kosova dhe krerët në Hagë kanë pasur besim në drejtësi dhe kanë qenë para saj për pesë vite pa asnjë dyshim në drejtësi ndërkombëtare. “Ne si institucione të Kosovës vazhdimisht kërkojmë që parimet më të larta të mbrojtjes së drejtave të njeriut të respektohen. I jap të drejtë qytetarëve tanë dhe i mbështes sa herë protestojnë për të kërkuar respektimin e këtyre standardeve,” shtoi ajo.
Presidentja Osmani kujtoi se lufta e UÇK-së ka qenë një luftë e drejtë për liri, për mbrojtjen e popullit dhe çlirimin e Kosovës nga okupimi që ka zgjatur për shekuj. “Kjo luftë ka pasur fokus mbrojtjen e pragut të shtëpisë dhe qytetarëve të pafajshëm, të cilët vriteshin dhe masakroheshin nga ushtria serbe,” tha ajo.
“Për këdo që ka parë luftën, dihet qartë se ka qenë vetëm një agresor: Serbia, dhe vetëm një viktimë: Kosova. UÇK-ja ka mbrojtur me dinjitet qytetarët e Kosovës, dhe drejtësinë e kësaj lufte do ta mbrojmë deri në fund,” përfundoi Presidentja Osmani.
