Kandidati i Lëvizjes Vetëvendosjes për kryetar të Lipjanit, Ilir Qeriqi ka thënë se si kryetar i këtij qyteti do të qeverisë me qytetarin në qendër.
Ai ka thënë se plani i tij qeverisës dallon nga ai i kryetarit aktual, Imri Ahmeti ku kryetari do të jetë në shërbim të qytetarëve.
“Si kryetar i Lipjanit do të qeverisë me qytetarin në qendër. Qytetari do të jetë qendra e bashkëpunimit. Nuk do të bëjmë një qeverisje siç ka qenë deri tash, por kryetari do të jetë në shërbim të qytetarit. Ne qeverisim me vlera, atributive me aftësi”, ka thënë Qeriqi në emisionin “Ditari” në Tëvvë1.
Ai ka thënë se plani i tij qeverisës është bërë pas skanimit të situatës në teren dhe kërkesat e qytetarëve.
Qeriqi ka thënë se programi i tij bazohet në gjashtë shtylla kryesore.
“Përmirësimi dhe rritja e shërbimeve shëndetësore, arsim cilësor dhe gjithëpërfshirës, infrastrukturë funksionale dhe të qëndrueshme,zhvillim lokal i qëndrueshëm dhe fuqizim i bujqësisë dhe punësimit,rini aktive, kulturë, sport për të gjithë, promovimi i punës vullnetare”, ka listuar ai pikat kryesore të programit të tij.
Qeriqi ka kritikuar qeverisjen aktuale, që siç ka thënë nuk kanë arritur të zgjidhin problemin me ujë të pijshëm për qytetarët. Ai ka thënë se ka planin për këtë problem.
Në arsim ka premtuar depolitizim, investime në infrastrukturë, matje të performancës, ndërtimin e katër çerdheve.
