Edhe një i dyshuar për spiunazh përfundoi në duart e Policisë së Kosovës, të enjten.
Fatmir Sheholli, u arrestua në kryeqytet derisa ishte duke pirë kafenë e mëngjesit.
E për disa orë, hetuesit policorë qëndruan në banesën e tij në lagjen Aktash të Prishtinës.
Nga aty, ata dolën me disa dokumente në duar.
Operacioni për arrestimin e tij, u bë në koordinim mes Prokurorisë Speciale dhe Agjencisë së Kosovës për Intelegjencë.
Lajmin për arrestimin e tij, e dha ministri në detyrë i punëve të brendshme, Xhelal Sveçla me ç’rast tha që kushdo që punon për Serbinë e kundër Kosovës do të ndiqet pa kompromis e pandalshëm.
“Individë si ky që kanë pasur hapësira mediatike të pakufizuara në vendin tonë ka bashkëpunuar me akterë që çdo ditë punojnë e veprojnë për të minuar Republikën tonë dhe progresin e saj. Mbesim të përkushtuar të mbrojmë vendin tonë nga të gjitha qarqet që nuk hezitojnë ta rrezikojnë atë për çfarëdo përfitimi të tyre. Koha e spiunëve të Serbisë në Kosovë ka përfunduar. Kushdo që punon për Serbinë e kundër Kosovës do të ndiqet pa kompromis e pandalshëm. Republika duhet mbrojtur me përgjegjësinë më të lartë institucionale dhe morale”, tha Sveçla.
Detaje për hetimin disa mujor të Shehollit dha Prokuroria Speciale e Kosovës.
“I dyshuari F.SH., është arrestuar në regjionin e Prishtinës, nën dyshimin e bazuar se ka kryer veprën penale ‘Spiunazh’, nga neni 124 paragrafi 3 të KPRK-së. Operacioni i arrestimit është kryer edhe me asistencë të Agjencisë së Kosovës për Inteligjencë. Me aktvendim të Prokurorisë Speciale, i dyshuari është ndaluar për 48 orë, dhe nga njësitet relevante të Policisë së Kosovës janë duke u kryer bastisje në vendbanimin e të dyshuarit, me qëllim të sigurimit edhe të provave të tjera materiale”, bëri të ditur Prokuroria.
Sheholli zyrtarisht mbante pozitën e drejtuesit të Institutit për Afirmimin e Marrëdhënieve Ndëretnike në Kosovë.
Vepra penale e spiunazhit, në Kodin Penal të Republikës së Kosovës hyn në kuadër të veprave penale kundër rendit kushtetues dhe sigurisë së Republikës së Kosovës.
Spiunazhi renditet në nenin 124 të këtij Kodi dhe nënkupton disa situata ku ndër to është; kur sekreti shtetëror i komunikohet, dorëzohet, apo i bëhet i arritshëm shtetit të huaj, organizatës së huaj apo personit që u shërben atyre.
Sipas kësaj, dënueshmëria minimale është 5 vjet burg, kurse maksimale është 12 vjet.
