Njësitë relavante të Policisë së Kosovës po vazhdojnë me orë të tëra duke bastisur banesën e Fatmir Shehollit, i cili u arrestua mëngjesin e sotëm nën dyshimin për përfshirje në veprimtari spiunazhi.
Sipas Prokurorisë Speciale, operacioni i arrestimit është zhvilluar me asistencë të Agjencisë së Kosovës për Inteligjencë (AKI).
“Pas zhvillimit të hetimeve disa mujore, me urdhër të Prokurorisë Speciale të Kosovës, të enjten hetuesit policorë nga Drejtoria për Hetimin e Krimit të Organizuar dhe Krimeve të Rënda në Policinë e Kosovës kanë arrestuar F.SH., nën dyshimet për veprën penale “Spiunazh”. I dyshuari F.SH., është arrestuar në regjionin e Prishtinës, nën dyshimin e bazuar se ka kryer veprën penale “Spiunazh”, nga neni 124 paragrafi 3 të KPRK-së. Operacioni i arrestimit është kryer edhe me asistencë të Agjencisë së Kosovës për Inteligjencë”, thuhet në njoftim.
Fatmir Shehollin u arrestua nën dyshimet e bazuara për spiunazh.
Lajmin e ka bërë të ditur ministri në detyrë i Punëve të Brendshme, Xhelal Sveçla, përmes një reagimi në Facebook, ku theksoi se rasti do të trajtohet me seriozitet të lartë institucional.
“Pres trajtim institucional me seriozitet të lartë të këtij rasti, i cili përbën një nga aktet më të rënda ndaj sigurisë dhe rendit kushtetues të Republikës së Kosovës”, ka shkruar Sveçla.
Ai ka theksuar se individë të caktuar, të cilët kanë pasur hapësira të gjera mediatike në vend, kanë bashkëpunuar me akterë që punojnë për të minuar sigurinë dhe progresin e Kosovës.
“Individë si ky që kanë pasur hapësira mediatike të pakufizuara në vendin tonë kanë bashkëpunuar me akterë që çdo ditë punojnë e veprojnë për të minuar Republikën tonë dhe progresin e saj”, ka shtuar ai.
Ministri Sveçla ka paralajmëruar ndjekje të pandalshme ndaj kujtdo që punon kundër interesave të shtetit të Kosovës.
“Koha e spiunëve të Serbisë në Kosovë ka përfunduar. Kushdo që punon për Serbinë e kundër Kosovës do të ndiqet pa kompromis e pandalshëm. Republika duhet mbrojtur me përgjegjësinë më të lartë institucionale dhe morale”, ka deklaruar Sveçla. /teve1.info/
