Kandidati i Lidhjes Demokratike të Kosovës për kryetar të Podujevës, Ekrem Hyseni ka premtuar se brenda një viti do të bëjë përmirësim të dukshëm sa i prektë furnizimit me ujë të pijshëm për banorët.
Ai ka thënë se plani i tij është në dy faza, ai i hapjes së dy rezervarëve dhe kyçjen e qytetarëve në ujësjellës.
“Ndërtimi i dy rezervarëve të ujit në fshatin Balloc, kapacitet rreth 20 mijë metër kub ujë, i cili mundëson furnizim më stabil. Kyçja e qytetarëve në ujësjellës. Brenda një viti me përmirësim jashtëzakonisht të madh ku mbi 90% do të mbulohet dhe do të ketë furnizim të qëndrueshëm dhe të vazhdueshëm”, ka thënë ai në emisionin “InfoNata” në Tëvë1.
Sa i përket fushës së arsimit ai ka theksuar se si problem është infrastruktura e dobët, mungesën e gjithëpërfshirjes.
Hyseni ka premtuar edhe depolitizim të shkollave.
Ai ka akuzuar kryetarin aktual për mosrealizim të projekteve, të cilat i kishte premtuar por nuk janë realizuar siç janë Spitali i qytetit dhe salla sportive.
Hyseni ka thënë se e ka në planin e tij ndërtimin e spitalit të qytetit dhe se për këtë do të angazhohet.
Ai ka thënë se edhe në emergjencën e re të qytetit nuk jepe shërbimet e duhura.
“Urgjenca e re është projekt shumë i mirë, i planifikuar si lokacion keq edhe i organizuar si shërbim jo mirë. Pacienti shkon të emergjenca e re, aty e gjen vetëm një specialist të mjekësisë emergjente. Shumë pacient udhëzohet me shkua me marrë shërbime në QKUK”, ka thënë Hyseni.
Sa i përket projekteve infrastrukturore ai ka thënë se parkingu nëntokësor është jetik për qytetin, dhe ka premtuar rrugë lidhëse në qytet.
