Ekipet indoneziane të kërkim-shpëtimit përfunduan të martën operacionet për gjetjen e viktimave të bllokuara nën rrënojat e një shkolle islamike me konvikt, e cila u shemb në provincën e Javas Lindore, pasi u gjetën mbi 60 trupa, njoftuan autoritetet përgjegjëse për menaxhimin e fatkeqësive.
Ngjarja ndodhi javën e kaluar në qytetin e vogël të Sidoarjos, ku komuniteti u përfshi nga trishtimi dhe pasiguria, si pasojë e dështimeve strukturore që çuan në shembjen e shkollës Al Khoziny.
Agjencia për Zbutjen e Fatkeqësive bëri me dije përmes një deklarate zyrtare se janë gjetur trupat e 67 personave nga ndërtesa, si dhe tetë pjesë trupi, të cilat aktualisht janë në proces identifikimi nga autoritetet policore.
Me këtë bilanc, agjencia e përshkroi fatkeqësinë si ngjarjen më vdekjeprurëse të vitit dhe deklaroi përfundimin e kërkimeve.
“Operacionet për shkak të strukturës së shembur të shkollës Al Khoziny… janë mbyllur zyrtarisht,” deklaroi Mohammad Syafii, kreu i agjencisë së kërkim-shpëtimit, pas pastrimit të rrënojave nga autoritetet përkatëse, citon Anadolu.
Ndërkohë, drejtori i operacioneve i agjencisë, Yudhi Bramantyo, bëri të ditur se ekipet e shpëtimit pastruan plotësisht rrënojat në vendin e ngjarjes dhe kontrolluan të gjithë zonën, duke arritur në përfundimin se mundësia për të gjetur trupa të tjerë është jashtëzakonisht e vogël.
“Numri i përgjithshëm i viktimave të evakuuara është 171, me 67 të vdekur, përfshirë tetë pjesë trupi, dhe 104 persona mbijetuan,” deklaroi Yudhi në një konferencë për shtyp.
