Kryetari i Kuvendit të Kosovës, Dimal Basha ka pritur sot në takim ambasadoren e Finlandës në Kosovë, Eevamari Laaksonen.
Temë kyçe e takimit ishin marrëdhëniet e shkëlqyera mes Kosovës dhe Finlandës, thellimi i relacioneve mes kuvendeve të të dyja vendeve dhe mundësia për forcimin e partneritetit ekonomik që nxit zhvillim dhe mirëqenie për qytetarët tanë.
Çështje e bisedës ishte edhe aktualiteti politik në Kosovë, përfshirë procesin e konstituimit të institucioneve dhe vonesat e shkaktuara nga vendimet e Gjykatës Kushtetuese.
“Kryetari Basha dhe ambasadorja Laaksonen diskutuan gjithashtu edhe për gatishmërinë e institucioneve të Kosovës në drejtim të integrimit të komuniteteve, si dhe për rëndësinë e bashkëpunimit ndërinstitucional për të avancuar këtë proces. Një pjesë e rëndësishme e bisedës iu kushtua edhe diasporës kosovare në Finlandë, e cila, siç tha kryetari Basha, mbetet urë e posaçme miqësie e vlerave dhe kulturave mes dy vendeve tona”, thuhet në njoftimin e Kuvendit.
Në këtë takim, u theksua nevoja për krijimin e iniciativave që nxisin dialogun ndërmjet të rinjve dhe komuniteteve lokale, që ndihmon në ndërtimin e mirëkuptimit dhe zhdukjen e paragjykimeve te brezat e rinj.
“Miqësia ndërmjet Kosovës dhe Finlandës mbetet e fuqishme dhe me vizion të përbashkët për integrim e bashkëpunim në linjë me aspiratat tona për anëtarësim në Bashkim Evropian, si dhe për një rajon që zhvillohet në paqe, demokraci dhe prosperitet”, theksoi Basha./teve1.info/
