Aktivistë, gazetarë dhe avokatë ndërkombëtarë të deportuar nga Izraeli pasi u përpoqën të shkelnin bllokadën detare 16-vjeçare të Gazës si pjesë e një flotilje humanitare kanë pretenduar se i janë nënshtruar abuzimit brutal fizik dhe verbal nga forcat izraelite gjatë ndalimit të tyre.
Abuzimet e dyshuara përfshinin privim nga gjumi dhe ilaçet, rrahje, drejtimin e pushkëve automatike në kokat e tyre, sulmin me qen, detyrimin për të fjetur në dysheme, nënshtrimin ndaj fyerjeve dhe detyrimin për të parë pamje të sulmeve të Hamasit ndaj Izraelit më 7 tetor 2023.
“Më rrahën që nga momenti që hymë në port deri në fund”, tha Saverio Tommasi, një gazetar italian. “Goditje në shpinë, goditje në kokë – dhe ata [ushtarët izraelitë] qeshën, qeshën me të gjitha këto. Kushdo që nuk i mbante sytë ulur ndëshkohej me një goditje në kokë”.
Forcat izraelite ndaluan javën e kaluar të gjitha anijet e Flotës Globale Sumud (GSF), që transportonin më shumë se 400 persona, përfshirë parlamentarë dhe aktivisten mjedisore, Greta Thunberg .
Shumica e personave u mbajtën në Ketziot, një burg i sigurisë së lartë në shkretëtirën Negev, i përdorur kryesisht për të ndaluar palestinezët të cilët Izraeli i akuzon për përfshirje në aktivitete terroriste.
Ministria e Jashtme e Izraelit i ka hedhur poshtë të gjitha pretendimet për keqtrajtim të anëtarëve të flotiljes si “gënjeshtra të paturpshme”, duke postuar në X të dielën në mbrëmje: “Të gjitha të drejtat ligjore të të ndaluarve mbrohen plotësisht”.
Ministri i sigurisë kombëtare, Itamar Ben-Gvir, ka thënë se ishte “krenar” për mënyrën se si stafi u soll në Ketziot, shkruan The Guardian.
Ai tha në një deklaratë për aktivistët: “Ata duhet të kuptojnë mirë kushtet në burgun e Ketziot dhe të mendojnë dy herë para se t’i drejtohen përsëri Izraelit.”
Ndërkohë, një flotë e re që u nis nga Turqia po udhëton drejt Gazës dhe është rreth 200 milje detare nga territori. Ajo mban rreth 250 persona, përfshirë mjekë, infermierë dhe gazetarë, në një traget të shndërruar në një spital lundrues.
