Për shkak të përkeqësimit të kushteve atmosferike, Ndërmarrja Publike “Termokos” SH.A. ka njoftuar se tashmë janë finalizuar përgatitjet për furnizimin me ngrohje në Qendrën Klinike Universitare të Kosovës, përmes ngrohtores që operon në këtë qendër shëndetësore.
Sipas njoftimit të publikuar nga “Termokos” në faqen zyrtare në Facebook, aktualisht janë duke u kryer testimet përfundimtare në rrjetin e ngrohjes dhe në gjithë sistemin.
“Janë finalizuar përgatitjet për fillimin e furnizimit me ngrohje nëpërmes Ngrohtores së QKUK-së për nevojat e klinikave të kësaj qendre mjekësore,” thuhet në njoftim.
Nëse moti vazhdon të mbetet i njëjtë, “Termokos” paralajmëron se shumë shpejt do të fillojë furnizimi i jashtëzakonshëm me ngrohje edhe për konsumatorët tjerë.
“Në rast se kushtet klimatike mbeten të njëjta, ditëve të ardhshme do të fillojë furnizimi i jashtëzakonshëm me ngrohje për gjithë konsumatorët tanë,” thuhet më tej në njoftim.
Ndërmarrja bën të ditur se është në gatishmëri të plotë dhe po e ndjek nga afër situatën meteorologjike, në koordinim të ngushtë me Korporatën Energjetike të Kosovës.
“NP ‘Termokos’ po përcjell me kujdes të shtuar situatën meteorologjike dhe në koordinim të ngushtë me KEK-un, jemi në gatishmëri të plotë për të përmbushur misionin tonë,” përfundon njoftimi.
