Departamenti Amerikan i Shtetit ka publikuar raportin për Trafikimin e Personave, ku Kosova është vlerësuar në Nivelin 2, që tregon se qeveria nuk përmbush plotësisht standardet minimale, por po bën përpjekje të dukshme për të luftuar trafikimin.
Në raport thuhet se në kategorinë ku është vlerësuar Kosova hyjnë shtetet, qeveritë e të cilave bërë përpjekje të konsiderueshme për ta luftuar trafikimin me njerëz, por që ende nuk kanë arritur të përmbushin plotësisht standardet minimale ndërkombëtare.
Aty theksohet se ndër veprimet e Kosovës përfshihen ndjekja penale e më shumë trafikantëve të dyshuar dhe identifikimi i më shumë viktimave, rritja e fondeve qeveritare për ndihmë ndaj viktimave dhe rritja e fondit për kompensim të viktimave.
“Qeveria e Kosovës nuk i përmbush plotësisht standardet minimale për eliminimin e trafikimit, por po bën përpjekje të konsiderueshme për ta bërë këtë. Qeveria demonstroi përpjekje në rritje në krahasim me periudhën e mëparshme të raportimit, prandaj Kosova mbetet në nivelin e dytë”, thuhet në raportin për Kosovën.
Raporti, gjithashtu, thekson se rastet e fëmijëve të detyruar nga prindërit për të lypur rrugëve, trajtohen shpesh si neglizhencë ose keqtrajtim, e jo si trafikim, duke ngritur shqetësime për identifikimin e pasaktë të viktimave. Kritika ka pasur për ndarjen e më pak fondeve për fushata ndërgjegjësimi.
