Deputeti i Lëvizjes Vetëvendosje, Nezir Kraki, ka thënë se zgjedhjet e reja janë një mundësi për t’i dhënë fund ngërçit politik në vend.
I pyetur nëse situata do të përsëritej edhe pas zgjedhjeve nëse LVV-ja nuk do të merrte vota të mjaftueshme për të qeverisur e vetme, ai u përgjigj me ironi.
“Ndoshta mbushen mend këta. Ka mundësi pas zgjedhjeve. Njerëzit mësojnë çdo ditë, çfarëdo moshe”, tha Kraki në emisionin “Mesditë” në Tëvë1.
Ai shtoi se qytetarët tashmë e kanë kuptuar se përpjekjet për ta relativizuar fitoren e zgjedhjeve ishin absurde.
“Qytetarët tashmë e kanë kuptuar që tentimin që me e quajt fituesin e zgjedhjeve si ‘një farë fituesi’ ka qenë absurd dhe i papranueshëm. Tentimi që me marrë me deformua vullnetin e shprehur me votë dhe ideja që 42 për qindëshi është gati si 17 për qindëshi është një shkencë matematikore ku njerëzimi nuk e njeh. Edhe njerëzit e Kosovës e kanë kuptuar se ajo matematikë nuk eksiton askund në botë”, deklaroi ai. /teve1.info/
