Pashko Camaj, sekretari i shoqatës “Vatra”që vepron në Shtetet e Bashkuara të Amerikës, ka thënë se besojnë që arsyeja e pezullimit të dialogut strategjik nga ShBA me Kosovën është edhe vonesë në krijimin e institucioneve të reja të dala nga zgjedhjet e 9 shkurtit.
Camaj duke folur për vizitën e presidentes së Kosovës, Vjosa Osmani dhe kryeministrit në detyrë, Albin Kurti, ka thënë se janë të rëndësishme, pasi ShBA është garancia e shtetit të Kosovës.
Ai në emisionin “InfoNata” ka thënë se pezullimi i dialogut strategjik nuk nënkupton që janë pezulluar diskutimet dhe se ato duhet të vazhdojnë.
Kryeministri në detyrë, Albin Kurti në ShBA duke folur për pezullimin e këtij dialogu ka thënë se nuk mund të bëjë kompromis me sundimin e ligjit kur është fjala për veriun e vendit.
Por, Camaj ka thënë se duhet të bëhen kompromise edhe pse ato mund të shihen si jo i pranueshëm
“Ne bisedë që kemi pasur me kryeministrin në detyrë kemi potencuar që dialogu të jetë në tryezë, sepse pa diskutim s’ka asnjë rezultat të mirë. Duhet ta kuptojmë njëherë e mirë, është e pakonstueshme se e mira jonë, siguria e shtetit të Kosovës , si ka qenë edhe formimi i shtetit është e lidhur me ShBA-në. Është mirë që nga njëherë të bëhen kompromise që në dukje nganjëherë janë si kompromise të papranueshme në sipërfaqe. Duhet të jemi më të drejtë në kërkesat e amerikane”, ka thënë Camaj.
Kurti në ShBA ka thënë se raportet me këtë vend janë të mira duke përseritur qëndrimin e tij se kanë vetëm dallime sa i përket disa çështjeve. Por, sa i përket pezullimit të dialogut strategjik nga ShBA ka thënë se kjo është bërë për shkak të sundimit të ligjit në veri, gjë për të cilën ka thënë se nuk mund të bëjë kompromis.
“Arsyeja e pezullimit të Dialogut të planifikuar Strategjik është për shkak të sundimit të ligjit në veri të Kosovës, i cili rezultoi të ishte kundër strukturave ilegale serbe dhe këtu nuk mund të bëj kompromise. Nuk mund t’ia lë këtë problem brezit tuaj. Mendoj që brezi im është ai që duhet ta përfundojë këtë”, ka thënë Kurti
