Prokuroria Speciale e Kosovës ka ngritur aktakuzë kundër dy personave, të identifikuar me inicialet D.B. dhe E.B., për veprën penale “Nxitja e përçarjes dhe mosdurimit”, për përmbajtje me rrezik ekstremist dhe thirrje publike për përkrahje të terrorizmit.
Sipas aktakuzës, të pandehurit dyshohet se kanë përhapur urrejtje ndërfetare dhe ideologji ekstremiste përmes rrjeteve sociale Facebook dhe TikTok, duke propaganduar luftë të armatosur dhe thirrje për xhihad, si dhe duke përkrahur publikisht organizatën terroriste ISIS.
Prokuroria ka paraqitur prova seD.B. dhe E.B. kanë vendosur flamuj të ISIS-it në kulmin e shtëpisë së tyre. Ata kanë bërë grafite me shkronja arabe në muret e jashtme, veprime që sipas organit të akuzës kanë rrezikuar rendin dhe sigurinë publike.
Në përmbajtjen e shpërndarë nga ata, thuhet se D.B. ka shfaqur refuzim dhe gjuhë fyese ndaj të gjithë atyre që nuk e praktikojnë fenë sipas bindjeve të tij, përfshirë shumicën e hoxhallarëve të Bashkësisë Islame të Kosovës.
Prokuroria ka propozuar Gjykatës Themelore në Prishtinë që të pandehurit të shpallen fajtorë dhe të vazhdohet masa e paraburgimit për D.B. dhe arresti shtëpiak për E.B., në përputhje me legjislacionin penal në fuqi.
