Kandidati i Lidhjes Demokratike të Kosovës për Obiliqin, Xhafer Gashi, ka deklaruar se zgjedhjet e 12 tetorit do të përmbyllen në rundin e parë, pa pasur nevojë për balotazh.
Në emisionin “Info Nata” në Tëvë1, Gashi tha se këtë herë LDK është më e përgatitur se në zgjedhjet e kaluara.
“Unë besoj shumë që më 12 tetor do të përmbyllet gjithçka, do të fitojmë pa balotazh. Edhe ne jemi më të përgatitur se herën e kaluar, pasi që atë kohë isha me iniciativë qytetare, ndërsa tani pjesa e LDK-së në Obiliq është pjesë përbërëse e kësaj gare. Unë besoj që në rundin e parë do të mbyllet gjithçka”, u shpreh Gashi.
Ai gjithashtu prezantoi platformën qeverisëse të LDK-së për Obiliqin, duke theksuar se është ndërtuar mbi tri shtylla kryesore.
“LDK-ja ka përgatitur platformën qeverisëse që bazohet në tri shtylla themelore: qeverisje transparente, lokale për të gjithë dhe zhvillim të qëndrueshëm ekonomik lokal. Gjithashtu ajo bazohet në 10 shtylla kryesore, duke filluar nga mjedisi, zhvillimi ekonomik e shumë të tjera”, ka deklaruar kandidati i LDK-së për Obiliqin.
