Kapiteni policor, Agim Vitia së bashku me rreshter, Lumnije Behluli ishin suspenduar nga puna në fillim të këtij muaji.
Dy eprorët që shërbejnë në Drejtorinë për Hetimin e Krimeve të Luftës, ishin intervistuar në Polici nën dyshimin për veprën penale “Spiunazhi”.
E pas disa javësh, të martën zyrtarisht tashmë kanë pushuar hetimet ndaj këtyre dy zyrtarëve.
Avokati i Vitisë, Naim Rudari thotë se hetimi ndaj tyre për këtë vepër ka qenë krejtësisht i padrejtë, i paarsyeshëm dhe i pabazuar.
“Të dyshohet dikush, të fillon hetimi për zyrtarët policorë në drejtim të veprës penale ‘Spiunazhi’, është jashtëzakonisht e rëndë. Pra për t’u kryer vepra penale ‘Spiunazhi’ paraprakisht duhet që ai person të ketë qasje në informata të klasifikuara si informata sekrete, konfidenciale apo top secrete dhe këtë nga institucioni që klasifikon, në këtë rast nga AKI dhe më pas do duhej të vërtetohej që ata persona kanë shpërndarë informacionin e klasifikuar te ndonjë grup tjetër”, ëshrë shprehur Rudari.
Ai shton se duhet një kërkim falje publike nga institucionet që kanë hetuar këtë rast.
“Hetimi për një muaj është provuar dhe vërtetuar se nuk ka pasur asgjë lidhur me këtë çështje, hetimi ka pushuar në tërësi në drejtim të asaj vepre penale apo cilësdo vepër penale dhe dje zyrtarët policorë nuk janë kthyer në punë, pritet që sot ata të kthehen sa më parë në punë. Madje ne kemi kërkuar që duhet kërkim falje ndaj tyre e madje duhet edhe kompensuar së paku në aspektin psiqik të njëjtit sepse janë lënduar shumë ata dhe familjet e tyre e po ashtu edhe gjithë Policia e Kosovës me këtë etiketim të pabazë”, ka thënë tutje Rudari.
Tëvë1 ka mësuar se i gjithë dyshimi kishte nisur nga komunikimi zyrtar përmes rrjetit social të Vitisë, i cili i kishte konfirmuar avokatit serb, Dejan Vasiq se nuk është arrestuar ndonjë person me emrin të cilin ky i fundit e kishte pyetur.
Avokati Vasiq i kishte dërguar këtë përgjigje me screenshot një të dyshuari nga Prokuroria Speciale, e që kjo fundit e kishte gjetur në telefonin e tij këtë bisedë.
Se kur pritet të kthehen në punë këta zyrtarë policorë dhe a kanë pushuar hetimet, tëvë1 ka pyetur Policinë e Kosovës, respektivisht Prokurorinë Speciale.
Por, asnjë nga këto institucione nuk i janë përgjigjur interesimit të televizionit, deri në publikim të kronikës.
Po ashtu, është kontaktuar edhe kapiteni Vitia, por për shkak të kufizimeve mbi Ligjin për Policinë, nuk ka pranuar të flasë para kamerës për rastin.
