Të martën në mbrëmje në qendër të Nicës pati tension të madh, ku shpërthyen incidente që përfshinin tifozët e Romës në prag të ndeshjes së Europa League midis verdhekuqve dhe ekipit francez.
Sipas L’Equipe, 102 persona “në posedim të armëve” u arrestuan dhe u morën në paraburgim. Gazeta citoi burime nga policia e Alpes-Maritimes. Incidentet thuhet se ndodhën në qendër të Place Masséna, në zemër të qytetit të rivierës franceze.
Sipas një dëshmitari, të cituar gjithashtu nga Nice-Matin, përleshja filloi pasi disa tifozë, të ulur në tarracën e një restoranti, filluan të hidhnin gota drejt policisë, duke shkaktuar një ndjekje nëpër rrugët e Nicës së Vjetër. Disa nga të arrestuarit mbanin balaklava për të mos u njohur.
Mbi 200 oficerë policie dhe xhandarë, përfshirë dy njësi të lëvizshme policie, u vendosën në qendër të qytetit për të shuar incidentet. Tifozëve të Romës iu sekuestruan objekte të topitura dhe të rrezikshme, të tilla si shufra hekuri, doreza fshesash, tuba plastike, lopata, thika dhe çekiçë.
Ultrasit e Romës u transferuan në stacione të ndryshme policie në departament dhe iu dorëzuan gjykatave nën autoritetin e prokurorit të Nicës. Sekuestrimi dhe reagimi i shpejtë i forcave franceze të rendit parandaluan dhunë dhe dëme të mëtejshme në qendër të qytetit.
