Analisti politik, Nexhmedin Spahiu, në emisionin “Info Nata” në Tëvë1 ka komentuar deklaratat e kryeministrit Albin Kurti në Këshillin e Përgjithshëm, duke i cilësuar ato si të panevojshme dhe të dëmshme për raportet ndërkombëtare të Kosovës.
“Është një shpullë e qeverisë së Kosovës për deklaratat të cilat i ka bërë kryeministri në Këshillin e Përgjithshëm. Nuk është aq tragjike sa paraqitet nga opozita dhe opinionistët. Edhe diplomatët amerikanë e kanë thënë qartë se raportet me Kosovën nuk i prishin punët me amerikanët pa dashur Amerika”, ka thënë Spahiu.
Ai shtoi se kryeministrit nuk i ka qenë e nevojshme të flasë për bashkimin e ushtrisë së Kosovës me atë të Shqipërisë.
“Çka i është dashur të thotë disa deklarata të cilat vetëm i tha për të bërë bashkë ushtrinë e Kosovës me ushtrinë e Shqipërisë, kur Edi Rama nuk e do këtë fare? Këto deklarata kanë qenë të panevojshme”, u shpreh Spahiu.
Spahiu ka kritikuar edhe presidenten Vjosa Osmani për qëndrimin e saj në New York, duke thënë se po shpenzon para të taksapaguesve të Kosovës pa rezultate konkrete.
“Edhe presidentja sa është tashmë në New York, harxhon paratë e taksapaguesve të Kosovës duke qëndruar atje në mbledhjen e Asamblesë së Përgjithshme. Ajo do të duhej të bënte një punë të vyer për Kosovën. Tek e fundit, para se me u kthyer është dashur të marrë ndonjë njohje”, ka thënë Spahiu.
