Një incident ka ndodhur të mërkurën brenda objektit të komunës së Leposaviqit.
Nënkryetarja Marina Bogojeviq është shoqëruar në Polici, pasi dyshohet se ka pasur shtyrje fizike me një zyrtare tjetër komunale.
Përpos saj, edhe viktima është shoqëruar në stacion policor, ku pas intervistimit me vendim të Prokurorit, janë liruar në procedurë të rregullt.
“Është akuzu ky zyrtar nga personi punëtori në fjalë se është sulmu rasti është hapë sulm nga prokurori dhe e njëjta është intervistu në cilësinë e të dyshimtës. Ashtu e kemi edhe ne informatën njëjtë e kemi interpretu edhe te PROKURORI ajo është e dyshushuar për sulm dhe është intervistu dhe liru”, bëri të ditur zëvendësdrejtori i Policisë për rajonin e veriut, Veton Elshani.
Ai nuk dha detaje rreth deklarimit të saj lidhur me këtë rast.
Ndërkaq, nga Komuna thanë për televizionin se deri te kjo ka ardhur pasi që viktima ka kërkuar vazhdimisht ta shohë vendimin e largimit nga puna, por që kontrata e saj ishte “kontratë mbi vepër”.
“Për këtë lloj kontrate nuk ka ndonjë vendim të veçantë kur ndërpritet, thjesht nuk vazhdohet më. Edhe pse nënkryetarja e komunës është përpjekur t’ia sqarojë këtë çështje, ish-zyrtarja ka tentuar të krijojë qëllimisht ndonjë skandal. Përkundër aludimeve për ‘sulm fizik’, ato nuk janë të vërteta”, thuhet nga Komuna e Leposaviqit.
Në njoftim theksohet se përkundër këtij incidenti, nënkryetarja Bogojeviq po vazhdon ta ushtroj normalisht detyrën e saj.
