“Kosova nuk e ka as gjendjen e as luksin të largojë 1.271 zyrtarë nga sistemi shëndetësor. Largimi i kuadrit më besnik dhe më të mirë që u përball me pandeminë, do të ishte padrejtësi. Për fat të keq, kjo mund të ndodhë, të gjithë këta mund të mbesin pa punë, gjatë ditëve në vijim, nëse Ministria e Shëndetësisë nuk ua vazhdon kontratat”, ka shkruar Zemaj në Facebook.
Zemaj u shpreh se këta profesionistë shëndetësorë nuk duhet të mbesin në rrugë ose t’u drejtohen ambasadave.
“1.271 mjekë, infermierë, laborantë, inspektorë dhe staf mbështetës të angazhuar në luftimin e pandemisë meriton respekt. Respekti institucional, përtej fjalëve të mira, do të ishte vazhdimi i kontratave të tyre. Ndryshe, ikja e kuadrit të arsimuar shëndetësor dhe jo vetëm, është papërgjegjësi e Qeverisë. 1.271 të rinj dhe të reja nuk duhet lejuar t’i drejtohen ambasadave e as të mbesin rrugëve. Qeveria në afat optimal duhet të gjejë zgjidhje për ta”.
Qeveria së fundmi ndau 1 milion e 700 mijë euro për pagesën e 1.271 profesionistëve shëndetësorë për periudhën mars 2022 – qershor 2022. Këta profesionistë u angazhuan gjatë kohës së pandemisë.
