Sami Hoti, Sedat Ramadani, Albert Kuqi, Artan Krasniqi zyrtarë policorë, janë suspenduar të martën nga vendi i punës.
Katër pjesëtarët e Njësisë së Reagimit të Shpejtë në Drejtorinë Rajonale të Prizrenit, kanë pranuar një vendim për suspendim në kohëzgjatje prej tri ditësh.
Autoriteti që mbikëqyr punën e policëve, Inspektorati Policor i Kosovës në një përgjigje për tëvë1, ka mohuar se ka bërë rekomandim për suspendimin e tyre.
“Duke ju referuar kërkesës suaj IPK ju njofton se nuk ka bërë ndonjë rekomandim për suspendim për këtë rast, ju lutem i referoheni me kërkesë Policisë së Kosovës për informacione shtesë”, thuhet nga IKP.
Në vendimin e marrë nga drejtori rajonal i Policisë në Prizren, Faton Alija bëhet e ditur se deri te suspendimi ka ardhur si pasojë e një shakaje që policët kanë bërë në një grup privat në një rrjet social.
Bëhet fjalë për kryeparlamentarin e sapozgjedhur, Dimal Basha.
Këtë e kanë konfirmuar edhe nga Sindikata e Policisë së Kosovës, në një përgjigje për mediumin.
Aty thuhet se janë të informuar për rastin dhe shprehin binjden në pafajësinë dhe profesionalizmin e këtyre policëve.
“Sindikata e Policisë së Kosovës njofton se është informuar nga përfaqësuesi sindikal i zyrtarëve policorë lidhur me rastin në fjalë. Ne po e ndjekim nga afër procesin që është duke u zhvilluar ndaj katër zyrtarëve policorë, të cilët aktualisht janë të suspenduar nga detyra. Sindikata e Policisë së Kosovës shpreh bindjen e saj të plotë në pafajësinë dhe profesionalizmin e këtyre zyrtarëve dhe beson se pas përfundimit të kësaj periudhe të suspendimit, ata do t’i kthehen detyrave të tyre”, kanë thënë nga sindikata.
Televizioni ka dërguar pyetje edhe në Policinë e Kosovës pasi vendimi është marrë nga ta, por që deri në publikim të kronikës nuk ka pasur përgjigje.
