Komandanti i Forcës së Kosovës (KFOR) të udhëhequr nga NATO, gjeneralmajor Enrico Barduani, mbajti më 15 dhe 16 shtator informimin e tij përfundimtar para Komitetit Ushtarak të NATO-s dhe Këshillit të Atlantikut të Veriut, në formatin e KFOR-it, në Selinë e NATO-s në Bruksel.
Gjatë raportimit, gjeneralmajor Barduani ndau vlerësimin e tij për gjendjen e sigurisë në Kosovë dhe aktivitetet e fundit të misionit.
Ai theksoi se “situata në Kosovë është e qëndrueshme, por mbetet subjekt i rreziqeve të përshkallëzimit të papritur, për shkak të një sërë çështjesh të pazgjidhura”.
Sipas tij, pavarësisht sfidave në terren, KFOR-i ka mbajtur kursin e tij, duke ndihmuar në ruajtjen e stabilitetit dhe shmangien e incidenteve që mund të kishin çuar në shpërthime të paqëndrueshmërisë, si dhe në mbështetjen e përpjekjeve diplomatike.
Gjeneralmajor Barduani foli edhe për forcimin e misionit, “përfshirë vendosjen e përkohshme të forcave rezervë”, si dhe për ruajtjen e një qasjeje fleksibile në terren përmes patrullimeve të rregullta, kontakteve me komunitetet lokale dhe aktiviteteve trajnuese.
Ai vuri në pah edhe thellimin e bashkëpunimit me partnerët kryesorë: komunitetin ndërkombëtar, organizatat e sigurisë së Kosovës dhe Forcat e Armatosura të Serbisë.
Duke rikujtuar mbështetjen e NATO-s për dialogun e lehtësuar nga BE-ja mes Beogradit dhe Prishtinës, Komandanti i KFOR-it nënvizoi:
“KFOR-i ka demonstruar edhe një herë se është i gatshëm dhe i aftë të luajë rolin e tij dhe të përshtasë qëndrimin e tij sipas nevojës. Megjithatë, rruga drejt sigurisë së qëndrueshme në Kosovë nuk është ushtarake. Është politike”.
Në Bruksel, gjeneral Barduani zhvilloi gjithashtu një takim me kryetarin e Komitetit Ushtarak të Bashkimit Evropian (CEUMC), Gjeneralin Seán Clancy, me të cilin shqyrtoi bashkëpunimin e KFOR-it me EULEX-in dhe operacionin EUFOR Althea në Bosnjë e Hercegovinë.
