Ushtria izraelite njoftoi të martën se operacioni i saj i zgjeruar në Qytetin e Gazës ka filluar dhe i paralajmëroi banorët të zhvendosen në jug.
Njoftimi nga zëdhënësi i ushtrisë izraelite, Avichay Adraee, pasoi deklaratën e Ministrit të Mbrojtjes, Israel Kataz të martën, se “Gaza po digjet”, shkruan AP.
Edhe kryeministri izraelit, Benjamin Netanyahu të martën i tha një gjykate në Tel Aviv se ushtria izraelite kishte nisur një “operacion intensiv në qytetin e Gazës”, raportoi transmetuesi publik KAN.
“Ne kemi filluar një operacion intensiv në Qytetin e Gazës”, tha Netanyahu në sallën e gjyqit.
Njoftimi përkoi me një sulm të dhunshëm izraelit në Gaza, ku palestinezët përjetuan një natë sulmesh të rënda ajrore dhe artilerie.
Sekretari amerikan, Marco Rubio duke folur me gazetarët në Izrael para nisjes së tij për në Katar, sugjeroi se ofensiva në Qytetin e Gazës kishte filluar.
Lufta e vazhdueshme e Izraelit në Gaza ka vrarë gati 65,000 palestinezë që nga tetori i vitit 2023 dhe ka shkatërruar enklavën, e cila përballet me urinë.
Izraeli po përballet me një padi për gjenocid në Gjykatën Ndërkombëtare të Drejtësisë për shkak të luftës së tij në territor.
