Lidhja Demokratike e Kosovës ka prezantuar kandidatët e saj për zgjedhjet lokale në komunën e Kamenicës. Në fokus është kandidati për kryetar, profesori Shaip Surdulli, i cilësuar si një njeri me integritet, përvojë dhe përkushtim.
Kryetari i LDK-së, Lumir Abdixhiku, në një postim në Facebook, tha se ekipi përbëhet gjithashtu nga 20 kandidatë për Kuvend Komunal, duke theksuar se zgjedhjet në Kamenicë kanë rëndësi jo vetëm për këtë komunë, por edhe për partinë dhe për gjithë Kosovën.
“Në Kamenicë prezantuam kandidatin tonë për kryetar, profesorin Shaip Surdullin. Një njeri me integritet, përvojë e përkushtim, gati të udhëheqë Kamenicën drejt zhvillimit. Prezantuam dhe ekipin prej 20 kandidatëve për Kuvend Komunal në këtë qytet të vogël, por me zemër dhe shpresë të madhe,” shkroi Abdixhiku.
Ai theksoi se vota për LDK-në është një mundësi për të dhënë fund populizmit dhe krizës së vazhdueshme, dhe për të sjellë zhvillim, dinjitet dhe një të ardhme evropiane.
“Këto zgjedhje nuk janë të rëndësishme vetëm për Kamenicën. Këto zgjedhje janë vendimtare për LDK-në dhe për gjithë Kosovën. Vota për LDK është antidoti i vetëm kundër krizës së vazhdueshme. Është shpresa për zhvillim, për dinjitet, për një të ardhme evropiane,” shtoi ai.
