Në pamje shihet kryeterroristi serb Milan Radoiçiq.
Këto lëvizje të tij rrugëve të Serbisë, janë në kuadër të ruajtjes së presidentit serb, Aleksandër Vuçiq në tubimet e tij politike.
Këto pamje, sipas avokatit serb, Çedomir Stojkoviq, tregojnë se Radoiçiq është angazhuar nga vet presidenti serb, bashkë me grupin e tij.
“Vetë, Milan Radojiçiq dhe pjesëtarë të grupit të tij, janë parë si pjesëmarrës aktiv dhe organizatorë të tubimeve të fundit të Vuçiqit. Nëse pjesëtarët e grupit të Radoiçiqit janë duke ruajtur rezidencat shtetërore, në të cilat është i vendosur presidenti Vuçiq, atëherë është shumë e qartë se vet presidenti Vuçiq ka angazhuar Milan Radoiçiq dhe grupin e tij”, ka thënë Stojkoviç.
Dalja hapur e Radoiçiqit dhe grupit të tij në mbrojtje të presidentit serb, sipas Stojkoviq, është tregues i qartë se grupi gjatë gjithë kohës ka qenë nën koordinim me presidentit serb, përfshirë edhe sulmin në Banjskë.
“Përmes këtyre aktiviteteve të Radoiçiq, presidenti Aleksandër Vuçiq pranon se ai personalisht qëndron pas sulmit në Banjskë. Përkundër që e mohoi përfshirjen dhe lidhjet e tij me Radoiçiq atëkohë, sot është plotësisht e qartë se ai ka kontroll mbi këtë grup paramilitarë. Fakti që tani Vuçiq publikisht është duke treguar se kontrollon grupin paramilitarë, pavarësisht se kundërshtoi ata për dy vite, tregon se në fakt, Aleksandër Vuçiq ka qenë i koordinuar gjatë gjithë kësaj kohe dhe ai është i vetdijshëm se fundi i tij është afër”, shprehet avokati serb.
Krejt në kundërshtim me atë se si do duhej të mbrohej një kre i shtetit, po shihen veprimet e fundit të Vuçiqit.
“Një president shteti në fakt do duhej të mbrohej prej institucioneve shtetërore dhe jo të huazohen grupe kriminale siç po bën tash presidenti Vuçiq, i cili jo vetëm Radoiçiqin por edhe të tjerë nga ky grup i Radoiçiqit që kanë marrë pjesë në sulmin terrorist në Kosovë, tani janë pjesë e mbrojtjes së afërt të Radoiçiqit, por pjesë edhe e atyre grupeve që kryejnë punët e pista për Radoiçiqin në Serbi”, vlerëson Hysen Gecaj njohës i sigurisë.
Për herë të parë, në mbrojtje të presidentit serb, Radoiçiq u pa gjatë protestave të mëdha në Serbi, në fund të muajit qershor të këtij viti.
Milan Radojiçiq ka marrë përgjegjësinë për sulmin terrorist në Banjskë të Zveçanit më 24 shtator të vitit 2023, ku u vra rreshteri Afrim Bunjaku.
