Me nisjen zyrtare të fushatës për zgjedhjet lokale të 12 tetorit, politologu Avdi Smajljaj ka ngritur shqetësime për mënyrën si partitë politike po i qasen këtij procesi.
Ai ka thënë se edhe pas ditësh kërkimi në internet, nuk ka gjetur programe të plota të kandidatëve për komunat, por vetëm pika të shpërndara në forma të përgjithshme.
“Ka ditë që kam hy në internet për të kërkuar programe të kandidatëve, nuk i gjen askund. I kanë disa pika, dy-tre pika, por s’kanë programe për t’i krahasuar. Programet do të duhej të ishin para se të niste fushata”, ka deklaruar Smajljaj.
Sipas tij, qytetarët kanë të drejtë të informohen dhe të krahasojnë ofertat politike përpara se të vendosin se kujt t’ia japin votën.
“Qytetarët kanë nevojë, sepse mbi bazë të atyre përcaktohen edhe për votë. Nëse nuk lexojmë programe atëherë jemi të papërgjegjshëm. Nëse qytetari e jep votën blanko pa qëllim, atëherë s’ka vlerë”, theksoi ai.
Smajljaj shtoi se mungesa e programeve të qarta jo vetëm që ul cilësinë e debatit publik, por edhe i bën partitë më pak të përgjegjshme për zotimet e tyre.
