Deputeti Tomorr Avdia e ka cilësuar si shqetësuese vendimin e Shteteve të Bashkuara për pezullimin e dialogut strategjik me Kosovën.
Ai tha se kjo goditje është shumë më e rëndë sesa ajo që Bashkimi Evropian i kishte bërë Kosovës para dy vitesh në fushën ekonomike, pasi sipas tij, përfshin dimensione të gjera gjeopolitike dhe fusha kyçe të zhvillimit të vendit.
“Është shqetësuese. E para, është një marrëveshje strategjike në raport ku vendi jonë ka ndjeshmërinë më të madhe në mirëmbajtjen e saj jetike, duke përfshirë këtu sigurinë, bashkëpunimin në fushën e drejtësisë, në energji dhe ekonomi – janë katër fusha ku Amerika pas asaj goditje të cilën unë nuk e quaj aspak të barabartë që na është dhënë atëherë para dy viteve nga BE-ja në fushën ekonomike. BE-ja, pra na ka goditë në fushën ekonomike, kjo është nga përmasa shumë më e madhe për arsye që kjo ka të përfshirë një gjeopolitikë. Në kosto financiare mund të jetë më e vogël, por në përmasat e bashkëpunimit dhe veprimit është më e madhe sesa ajo e BE-së”, tha Avdia në emisionin “Këndi i Debatit” në Tëvë1.
Ai shtoi se ky vendim i ShBA-së është një shuplakë e madhe për tërë klasën politike në Kosovë.
“Kjo është shuplakë e madhe ndaj klasës politike në tërësi. Sepse, tani ato lojërat që qytetarët iu kanë mërzitur i kanë shqetësuar”, deklaroi Avdia.
Ambasada e SHBA-së në Prishtinë ka bërë të ditur se pezullimi i Dialogut Strategjik është marrë për shkak të veprimeve të Qeverisë së kryeministrit në detyrë, Albin Kurti, të cilat, sipas njoftimit, kanë rritur tensionet dhe paqëndrueshmërinë, duke e vështirësuar bashkëpunimin mbi prioritetet e përbashkëta. /teve1.info/
