Kryetari i OVL-UÇK-së, Hysni Gucati, ka deklaruar se institucionet e Kosovës janë duke penguar organizimin e protestës që do të mbahet më 14 shtator në Hagë.
Në emisionin “Mesditë” në Tëvë1, Gucati tha se jo vetëm që nuk kanë pasur përkrahje nga shteti, por sipas tij, ka pasur edhe përpjekje për t’i penguar.
“Mua më vjen keq që duhet me jav jep një lajmë në televizionin e juve. Këto institucione të vendit tonë, lëre që nuk na ndihmojnë, por po na pengojnë edhe për protestën që do të mbahet. Kanë tentuar të më pengojnë mua që të mos shkoj në Parlamentin e Evropës, ku të mërkurën isha në Këshillin e Evropës dhe i shpreha të gjitha pakënaqësitë dhe rezervat e mia kundër Gjykatës Speciale. Kjo qeveri, lëre që nuk na jep mbështetje financiare për mbrojtje, por po pengon punën tonë”, tha Gucati.
Ai po ashtu akuzoi Qeverinë për lobim në Strasburg, duke thënë se janë shpërndarë edhe fletushka për të dekurajuar pjesëmarrjen e mërgatës në protestë.
“Kjo qeveri na ka penguar, kanë bërë lobim tri ditë në Strasburg të Francës për të mos marrë pjesë delegacioni i veteranëve me eurodeputetët. Kanë shpërndarë fletushka nëpër Evropë që të mos shkojnë mërgimtarët në protestë. Në ato fletushka nuk ka emër, janë bërë në mënyrë tinëzare, ashtu siç e ka zakon VV-ja. Unë ato fletushka i kam në telefon”, u shpreh Gucati.
Protesta e paralajmëruar në Hagë pritet të mbahet të dielën, më 14 shtator, ndërsa sipas organizatorëve, aty do të mblidhen qytetarë dhe përfaqësues të mërgatës për të shprehur pakënaqësinë e tyre ndaj Gjykatës Speciale.
