Komisioni Qendror i Zgjedhjeve (KQZ) ka njoftuar qytetarët lidhur me mënyrën e votimit në zgjedhjet komunale që do të mbahen më 12 tetor. Ky institucion ka theksuar rëndësinë e respektimit të procedurave për të siguruar vlefshmërinë e votës.
Sipas KQZ-së, qytetarët duhet së pari të kontrollojnë nëse fletëvotimet janë të vulosura nga KQZ-ja. Në kabinën e votimit do të vendosen broshura me emrat e kandidatëve për t’iu ndihmuar votuesve.
Për procesin e votimit do të përdoren dy fletëvotime:
Fletëvotimi i verdhë: është i dedikuar për kryetarin e komunës. Në të qytetari duhet të shënojë vetëm një kandidat ose kandidate.
Fletëvotimi i kaltër: është për Kuvendin Komunal. Në anën e majtë votuesi shënon subjektin politik, ndërsa në anën e djathtë një kandidat apo kandidate nga lista e atij subjekti.
Pas përfundimit të votimit, fletëvotimet duhet të palosen në mënyrë që të mos shihet për kë është votuar dhe më pas të vendosen në kutitë përkatëse.
KQZ-ja u ka bërë thirrje qytetarëve që të ndjekin me kujdes udhëzimet në mënyrë që votat e tyre të jenë të vlefshme.
