Carlo Ancelotti regjistroi humbjen e parë në pankinën e Brazilit, pasi “Seleçao” u mposht 1-0 nga Bolivia në ndeshjen e fundit të kualifikimeve për Botërorin 2026. Sfida u vendos nga një penallti e diskutueshme, e akorduar pas ndërhyrjes së VAR-it dhe e realizuar nga Miguelito.
Pas ndeshjes, presidenti i Federatës Braziliane, Samir Xaud, doli me tone të forta kritike ndaj arbitrit Garay dhe organizimit në stadiumin bolivian. “Ishte trishtim ajo që ndodhi. Erdhëm për të luajtur futboll, por që nga mbërritja pamë anti-futboll. Në lartësinë prej 4.000 metrash luajtëm kundër arbitrimit, policisë dhe madje edhe kundër djemve të topave, që vononin ose fusnin topat pa rregull. Një farsë e vërtetë”, u shpreh ai.
Xaud e cilësoi këtë ndeshje si shembull negativ për futbollin e nivelit ndërkombëtar: “Ky nuk është futbolli që presim në Amerikën e Jugut. Kur luan kundër 14 lojtarëve, gjithçka bëhet më e vështirë. Shpresoj që Conmebol të ndërhyjë, sepse gjithçka është e regjistruar”.
Numri një i futbollit brazilian denoncoi gjithashtu sjelljen e policisë lokale, duke deklaruar se lojtarët dhe stafi u trajtuan në mënyrë të dhunshme, një fakt që shtoi indinjatën e Federatës pas këtij dueli.
